BUKIDNON — Mokabat sa 10 ka ream sa gidudahang gipalusot o smuggled nga sigarilyo ang nasakmit sa kapulisan sa duha ka bulag nga operasyon sa mga lungsod sa Talakag ug Cabanglasan niadtong Hunyo 14, diin duha ka indibidwal ang dungan nga gipamaklo.
Didto sa lungsod sa Talakag, tiklo ang usa ka 21-anyos nga lalaki human nakuhaan og unom ka ream sa Filter King ASTRO nga sigarilyo nga walay mandatory health warnings ug BIR tax stamps nga nagkantidad og ₱4,800. Ang maong malampusong operasyon gikasas sa Talakag Municipal Police Station inabagan sa 1st Bukidnon PMFC ug 1004th MC RMFB-10.
Samtang sa Cabanglasan, laing 41-anyos nga lalaki ang na-aresto sa mga otoridad human kini nasakmitan og upat ka ream sa Commando brand nga sigarilyo nga nagkantidad og ₱3,200. Nasayran nga wala usab magbaton og required graphic health warnings ang maong mga produkto, nga usa ka klarong paglapas sa Republic Act 10643 o Graphic Health Warnings Law.
Sa kasamtangan, ang duha ka mga dinakpan lakip ang mga nakumpiskang kontrabando ang giturn-over na ngadto sa tagsa-tagsa ka Municipal Health Office (MHO) alang sa saktong legal nga disposisyon, samtang padayon ang gipakahingusgan nga kampanya sa Bukidnon PNP batok sa pagsulod sa mga ilegal nga produkto sa lalawigan.