DON CARLOS, BUKIDNON — Boluntaryong mitahan sa mga awtoridad ang usa ka kanhing miyembro sa Milisya ng Bayan nga sakop sa nabungkag nga Guerilla Front 68 didto sa Headquarters sa Bukidnon 2nd Provincial Mobile Force Company (PMFC) sa Barangay Pinamaloy, lungsod sa Don Carlos, Bukidnon.
Giila ang maong surrenderer sa alyas nga “Tamsi,” 47-anyos. Misurender si Tamsi niadtong Hunyo 13 pinaagi sa gikasang intelligence-driven operation sa Bukidnon 1st PMFC, inabagan sa 1003rd Maneuver Company, Regional Mobile Force Battalion 10, ug Bukidnon Provincial Intelligence Unit.
Sa kasamtangan, si alyas “Tamsi” anaa na sa kustodiya sa intelligence operatives sa Bukidnon 2nd PMFC alang sa gipahigayon nga debriefing ug profiling, isip kabahin sa nagpadayong kampanya sa kapulisan batok sa mga armadong grupo ug sa pagpatunhay sa kalinaw sa lalawigan.