Suportado sa Department of Agriculture – Bukidnon ang “Coffee Road Map Project” sa probinsya sa isip kabahin sa ilang Regional Agriculture Development Program aron mas mapalambo pa ang industriya sa kape.
Gipadayag ni Jose Apollo Y. Pacamalan, ang Regional Executive Director sa DA-Region X, nga tumong niini nga himuon ang Bukidnon nga nag-unang tinubdan sa kalidad nga Arabica coffee sa rehiyon.
Gipasabot ni Pacamalan nga bisan pa og lig-on na ang produksyon sa humay, mais, ug uban pang mga lagutmon sa probinsya, ang maong proyekto magsilbing dugang tatak sa Bukidnon sa sektor sa agrikultura.
Mas gipalig-on usab sa ahensya ang ilang suporta alang sa industriya sa kape, human sa malampusong kompetisyon sa kape nga gipahigayon sa Dakbayan sa Valencia, Bukidnon, nga gidumala sa Southeast Asian Coffee Brewers.
Matud ni Jose Apollo Y. Pacamalan, ang Regional Executive Director sa DA-10, dako ang ilang papel diha sa pagpatuman sa mga lakang sa kagamhanang probinsiyal aron masiguro ang malungtarong pamaagi (sustainability) sa pagpananom og kape alang na sa dugang pagpalambo sa ekonomiya ning lalawigan.