Nanguna si Pangulong Ferdinand Marcos Jr. sa mga kalihokan alang sa pagsaulog sa ika-128 nga anibersaryo sa Adlaw sa Kagawasan karong adlawa, Hunyo 12, samtang nanawagan siya sa tanang Pilipino nga ampingan ang kagawasan ug maghiusa sa pag-atubang sa mga hagit sa kasamtangang panahon.
Sa iyang mensahe, gipasiugda sa Pangulo nga ang deklarasyon sa kagawasan sa Kawit, Cavite niadtong Hunyo 12, 1898 nagpabiling simbolo sa katungod sa mga Pilipino sa pagdumala sa ilang kaugalingon ug sa paghulma sa kaugmaon sa nasud.
Matud ni Marcos, ang kagawasan dili lamang usa ka bililhong kabilin gikan sa mga bayani kondili usa usab ka responsibilidad nga kinahanglan mapanalipdan ug mapadayon sa matag henerasyon.
Gipunting usab sa Pangulo ang mga modernong hagit nga giatubang sa nasud, lakip na ang pagbatok sa misinformation, responsableng paggamit sa teknolohiya, ug pagpalig-on sa pagsalig ug panaghiusa sa katawhan.
Atol sa buntag, nanguna si Marcos sa flag-raising ceremony ug mitambong sa Independence Day Parade sa Quirino Grandstand diin miapil ang mga representante gikan sa nagkadaiyang ahensya sa gobyerno, Armed Forces of the Philippines, Philippine National Police ug uban pang sektor.
Gihatagan usab sa Pangulo og pasidungog ang mga bayani nga nakigbisog alang sa kagawasan sa nasud ug giawhag ang publiko nga mahimong aktibong mga lungsoranon aron suportahan ang maayong pagdumala ug ang programa sa Bag-ong Pilipinas.
Subay niini, gipahibalo usab ni Usec. Secretary Claire Castro nga wala sila makadawat og bisan unsang hulga nga may kalabotan sa selebrasyon sa Independence Day. Apan, nagpabiling alerto ang mga awtoridad aron masiguro ang malinawon ug luwas nga pagdumala sa mga kalihokan.