Misaka na sa 35 ka tawo ang namatay human miigo ang kusog nga magnitude 7.8 nga linog sa Sarangani niadtong Lunes sa buntag, Hunyo 8, 2026.
Nagdala usab ang maong kusog nga pagtay-og sa yuta og grabeng kadaot sa mga building, pagsuspinde sa klase ug flights, ug temporaryong tsunami warnings sa pipila ka nasud, gibawi na kini.
Sumala sa Office of Civil Defense, pinakagrabe ang epekto sa General Santos City diin 10 ang kumpirmadong namatay, samtang 12 pa ang missing.
Kadaghanan sa mga biktima namatay tungod sa pagkalumpag sa debris, paghugno sa mga estruktura, ug landslide.
Kapin 134 usab ang nasamdan sumala sa Philippine National Police.
Isa sa labing grabeng naapektuhan mao ang General Santos City diin nahugno ang duha ka andana nga eskwelahan samtang adunay mga estudyante sulod.
Padayon pa karon ang verification sa aktuwal nga ihap sa mga naapektuhan.
Makita sa mga video nga mikatap online ang pagkahugno sa pipila ka unibersidad ug commercial buildings lakip ang mga restaurant ug uban pang establisyemento.
Tungod sa kusog nga linog, nagdali-dali og evacuate ang mga residente aron malikayan ang dugang peligro.
Mukabat sa 8,600 ka eskwelahan sa 43 divisions sa unom ka rehiyon ang naapektuhan, sumala sa Department of Education.
Temporaryo usab nga gisira ang General Santos International Airport gikan alas-8:45 sa buntag hangtod alas-3 sa hapon alang sa safety inspection.
Labing-17 ka domestic flights ang nakansela samtang gilimitahan ang operasyon sa airport para sa government, military, ug humanitarian flights.
Gawas sa Pilipinas, nagpagawas usab og tsunami warning ang Indonesia ug Japan human sa linog, apan kini gibawi ra dayon sa ulahi.