Tingkagol na karon sa selda sa kapulisan ang usa ka 43-anyos nga lalaki nga giila sa alyas “Bacal” human kini nasikop sa hiniusang drug buy-bust operation sa Purok 2, Barangay West Kibawe, lungsod sa Kibawe, Bukidnon, pasado alas-6:30 sa gabii niadtong Hunyo 7.
Gipangulohan sa Kibawe Municipal Police Station uban ang PDEA ang maong operasyon nga misangpot sa pagkasikop sa suspetsado kinsa dugay nang ginasubay tungod sa kalambigitan niini sa ilegal nga droga. Narekober gikan sa iyang posisyon ang unom ka sachet sa gituohang shabu nga motimbang og 0.5721 gramos ug adunay standard drug price nga P3,890. Gawas sa maong kontrabando, nakuha usab sa mga otoridad ang usa ka cellphone ug ang gigamit nga buy-bust money.
Sa pagkakaron, ang mga nakumpiskang ebidensya ang gidala na sa Provincial Forensic Unit alang sa laboratory examination, samtang giandam na sa kapulisan ang pagpasaka og kasong paglapas sa Sections 5 ug 11 sa Republic Act 9165 o Comprehensive Dangerous Drugs Act batok sa maong dinakpan.