Tingkagol na karon sa selda sa kapulisan ang usa ka 29-anyos nga lalaki nga giila sa alyas “ACMAD” human nasakmitan og kapin 85-mil pesos nga kantidad sa gituohang shabu sa Purok 1, Barangay Bacusanon, lungsod sa Pangantucan, Bukidnon.
Gikasado ang maong hiniusang buy-bust operation pasado alas-6:31 sa buntag niadtong Hunyo 6 sa mga operatiba sa Bukidnon Provincial Drug Enforcement Unit ug Pangantucan Municipal Police Station. Narekober gikan sa posisyon sa suspetsado ang unom ka sachet sa maong iligal nga droga nga motimbang og 12.50 gramos, uban ang usa ka libo ka pesos nga buy-bust money ug usa ka pakete sa sigarilyo.
Sa pagkakaron, anaa na sa kustodiya sa Pangantucan MPS ang maong dinakpan alang sa tukmang disposisyon, samtang ang mga nakumpiskang kontrabando ang gi-turnover na sa Bukidnon Provincial Forensic Unit alang sa laboratory examination dungan sa pag-andam sa kasong paglapas sa Republic Act 9165 batok kaniya.