Gikumpirma sa sikat nga K-pop star ug aktres nga si Sandara Park ang pagkatudlo isip bag-ong Public Relations Ambassador sa Overseas Koreans Agency (OKA).
Pinaagi sa usa ka post sa iyang social media, gipahibalo sa aktres ang maong kalamboan ug mipaabot sa iyang kinasingkasing nga pasalamat sa maong ahensya tungod sa gihatag nga pagsalig niini alang sa maong tahas.
Ang pagpili kang Park giisip nga haom tungod matud pa sa personal nga kasinatian niini sa pagpuyo sa Pilipinas sulod sa daghang katuigan.
Kini nga background giingong naghatag kaniya og mas lawom nga pagsabot ug koneksyon sa mga sitwasyon ug panginahanglan sa mga Koreano nga nagpuyo sa ubang kanasuran.
Ang Overseas Koreans Agency maoy ahensya sa kagamhanan sa South Korea nga gitahasan sa pag-atiman sa katungod ug pagpalig-on sa relasyon sa mga overseas Korean nationals sa tibuok kalibutan.