Usa ang patay samtang kritikal ang laing usa human nagkabangga ang duha ka motorsiklo sa Sayre Highway, Purok-4, Barangay 7, Malaybalay City, kagahapong adlawa, Mayo 31, 2026, pasado alas 5:00 sa hapon.
Giila ang mga drayber sa maong insidente nga sila alyas Ron-Ron, kinsa nagmaneho sa Yamaha Mio kauban ang usa ka wala pa mailhing lalaki nga backrider, ug alyas Migz, residente sa Purok-5, Barangay Linabo, nga maoy drayber sa Suzuki Raider.
Subay sa mga taho, nasayran nga gikan sa Barangay Casisang paingon sa sentro sa siyudad ang Yamaha Mio, samtang pabalik sa pikas direksyon ang Raider.
Pag-abot sa maong lugar, kalit matud pa nga niliko sa wala ang kusog nga nagpadagan nga si alyas Inggo, rason nga mibangga kini sa nagbahada nga Raider ni alyas Migz. Gumikan sa kakusog sa impak, nangalagpot ang mga biktima ug nakaangkon og seryosong mga samad sa lawas hinungdan nga daling gipangdala sa ospital.
Subo pamalandungon apan nakabsan sa kinabuhi ang backrider sa Yamaha Mio, samtang nagpabiling kritikal ang kahimtang sa drayber sa Raider.
Nasayran usab gikan sa mga nakasaksi nga nanimaho pang ilimnong makahubog ang drayber sa Yamaha Mio sa dihang nahitabo ang disgrasya.
Sa pagkakaron, nagpadayon pa ang gihimong imbestigasyon sa Malaybalay City Police Station aron masuta kon kinsa ang angay manubag sa maong hitabo.