Naghangyo ang legal team ni kanhi Pangulong Rodrigo Duterte sa International Criminal Court nga i-postpone hangtod 19 ka buwan ang pagsugod sa trial proceedings batok kaniya.
Kini sunod sa confirmation of charges batok sa kanhi pangulo niadtong Abril 23, 2026. Base sa filing sa bag-ong lead counsel ni Duterte nga si Peter Haynes ngadto sa ICC Trial Chamber III, nagkinahanglan pa sila og dugang panahon aron makapangandam sa kaso.
Gipakita usab sa abogado nga adunay mga nangaging kaso sa ICC nga gisugdan lamang human sa 14 hangtod 19 ka bulan sukad sa confirmation of charges.
Kon aprobahan, posible nga mabalhin ang trial tali sa Hunyo ug Nobiyembre 2027.
Supak kini sa hangyo sa prosekusyon nga sugdan ang trial sa Nobiyembre 30, 2026 o wala pay walo ka bulan human sa confirmation of charges.
Matud pa sa depensa, dili pa angay nga magtakda dayon og petsa tungod sa pipila ka mga isyu nga wala pa masulbad nga posibleng makaapekto sa paglitis.
Sumala usab ni Haynes nga kinahanglan una matino sa Trial Chamber kon “fit” pa ba si Duterte nga moatubang sa trial.
Bisan pa man giila sa depensa ang medical evaluation nga gihimo atol sa pre-trial phase, sigon niini nga padayon ang paghinay sa kahimtang sa panglawas sa kanhi pangulo ug kinahanglan pa kining masusi pag-ayo sa dili pa magsugod ang trial.