Gipasabot sa usa ka legal expert ug law professor nga dako gihapon og papel ang “rule of law” sa kontrobersiya kalabot sa posibleng pag-aresto kang Senador Ronald “Bato” dela Rosa pinaagi sa giingong ICC warrant.
Sumala ni Atty. Oscar Moreno, nga lisod mapadayon ang argumento sa Senado nga mahimong tagaan og “protective custody” si Dela Rosa gumikan limitado lamang ang parliamentary immunity sa mga kaso nga adunay silot nga unom ka tuig paubos.
Apan sa kaso sa crimes against humanity, mas bug-at ang posibleng silot busa dili kini sakop sa immunity gikan sa pag-aresto.
Gipatin-aw usab sa abogado nga bisan walay local warrant gikan sa korte sa Pilipinas, adunay legal nga basehan ang ICC warrant pinaagi sa Republic Act 9851 ug sa partisipasyon sa Pilipinas sa international treaties ug sa Interpol.
Matod niya, ang Korte Suprema kinahanglan gihapon mohimo og pinal nga desisyon kalabot sa legalidad sa maong warrant, apan wala pa kini nagpagawas og temporary restraining order o TRO aron pugngan ang posibleng pag-aresto.
Gihisgutan usab sa maong law expert nga ang nahitabong tensyon sa Senado ug ang pag-ilis sa liderato niini adunay dakong koneksyon sa impeachment issue ug sa political balance sa Senado.
Matod pa niya, posible nga maapektuhan ang pwersa sa mayorya kon maaresto si Dela Rosa.
Bisan pa man sa politikal nga init nga sitwasyon, gipunting sa abogado nga mas importante gihapon nga sundon ang balaod ug respetuhon ang demokratikong proseso kaysa magbase sa popularidad sa mga personalidad.