“Nasumhan na gyud ko.” Kini ang prangka nga pamahayag ni City Councilor Rendon Sangalang atol sa session sa konseho samtang iyang gihagit ang Malaybalay City Water District (MCWD) ug PrimeWater nga hatagan og dinaliang aksyon ang krisis sa tubig sa Aglayan, Linabo, ug Cabangahan.
Gibutyag sa konsehal nga halos usa ka tuig na nga nag-antos ang mga residente sa “zero to four hours” nga suplay, hinungdan nga napugos ang katawhan sa sige og palit og tubig. Namugos si Sangalang nga unahon ang pagpaayo sa San Jose reservoir ug tarungon ang “valving scheduling” sa kadlawon aron masiguro nga duna’y mapundo nga tubig para sa buntag.
Giangkon ni MCWD General Manager Engr. Nolito Binahon nga duna’y posibilidad nga mapuno ang reservoir sulod sa upat ngadto sa lima ka oras kon palungon ang suplay sa ubang dapit panahon sa kadlawon. Tungod niini, nakuha sa konsehal ang commitment sa water district nga sulayan ang maong sistema aron mahatagan og bisan lima hangtod napulo ka oras nga suplay ang mga barangay nga giisip nga “Red Areas” o prayoridad.
Ang maong isyu dakong hinungdan sa nagpadayong reklamo sa publiko, samtang nag-ung-ong ang hagit sa MCWD kon mapatuman ba gyud ang gisaad nga scheduling aron mahunong na ang kalbaryo sa mga konsumidor.