Opisyal na nga nailhan ang mga bag-ong rayna sa Miss Universe Philippines human sa malampusong Coronation Ball nga gipahigayon sa Parañaque City kagahapong adlawa, Mayo 10. Sa maong mabulukong gabii, gikoronahan ang mga kandidata nga morepresentar sa nasud sa nagkadaiyang international pageants ubos sa brand nga “The Miss Philippines.”
Pipila sa mga giila mao sila si Allyson Hetland isip Miss Supranational, Bella Ysmael isip Miss Cosmo, ug Jenrose Javier isip Miss Eco International.
Naangkon usab ni Apriel Smith ang titulong Miss Charm samtang sila si Nicole Borromeo ug Marianne Arellano ang modala sa mga korona para sa Miss Worldwide ug Miss Tourism Worldwide.
Kini ang unang higayon nga naggahin og bulag nga seremonyas ang organisasyon alang sa pagpasa sa mga korona aron mahatagan og igong pasidungog ang matag mananaog.
Ang maong lakang nagpuli sa karaan nga tradisyon diin ang pag-award gihimo dayon dinalidali human mismo sa main pageant night.
Kahinumduman nga ang kinatas-ang korona nga Miss Universe Philippines 2026 una nang naangkon ni Bea Millan-Windorski niadtong Mayo 2 didto sa Pasay City.