Gipadayag si Senador Erwin Tulfo nga mahimong dakong kaulaw alang sa Senado kung adunay mahitabo nga giingong “kudeta” sa liderato aron lang mapahunong ang impeachment proceedings batok kang Bise Presidente Sara Duterte.
Ang iyang pahayag mitumaw sa mga spekulasyon nga posibleng tangtangon si Senate President Vicente Sotto III bisan wala pa madawat sa Senado ang Articles of Impeachment gikan sa House of Representatives of the Philippines.
Matud ni Tulfo, lisod ipasabot sa publiko kung nganong kinahanglan pa usbon ang liderato sa Senado samtang nagpaabot ang nasud sa impeachment trial.
Para sa senador, dili angay gamiton ang internal nga liderato sa Senado aron mapahunong o madugay ang usa ka proseso nga giila sa Konstitusyon sama sa impeachment.
Gipunting usab niini nga angay tugotan ang hustong proseso aron mahatagan og higayon si Vice President Sara Duterte sa pagdepensa sa iyang kaugalingon.
Dugang pa niini, ang tinuod nga katuyoan sa impeachment trial mao ang pagpangita sa kamatuoran.
Sa laing bahin, sigon ni Senate President Vicente Sotto III nga andam ang Senado nga maglihok dayon kung madawat na ang Articles of Impeachment, bisan pa og kinahanglan pa og preparasyon sa proseso.
Gisuportahan usab kini ni Senador Sherwin Gatchalian nga miingon nga dili angay mahimong isyu sa pagpuli sa liderato ang impeachment, kay obligasyon sa Senado nga dunggon kini subay sa balaod ug Konstitusyon.