Gisentro sa diskusyon sa Kamara ang isyu sa dakong pondong gigamit panahon sa eleksyon, human sa privilege speech ni Batangas Representative Leandore Leviste.
Sa pamahayag niini, gipunting ni Leviste ang giingong dakong kantidad nga nagamit sa mga campaign activities ug gipangutana usab niya nganong adunay mga contractor nga giingong direktang mogasto o mo-host sa mga political events sa Batangas.
Lakip sa mga ngalan nga nahisgutan mao sila Executive Secretary Ralph Recto, Batangas Governor Vilma Santos-Recto, ug Construction Worker Solidarity Party-list Representative Galdicola.
Sa interpelasyon, nangutana si Representative Janet Garin bahin sa tinuod nga gasto sa eleksyon sa Batangas.
Mitubag si Leviste nga mas ubos matud pa ang election spending sa Batangas itandi sa ubang probinsya, apan sumala ni Rep. Leviste nga dili ang kantidad sa campaign spending ang sentro sa iyang punto.
Matud niini, ang mas importante nga pangutana mao kon nganong adunay mga contractor nga dayag nga nagasuporta ug nagagasto alang sa mga politiko panahon sa eleksyon.
Samtang, mipalag si Deputy Speaker JayJay Suarez ug nangayo og klarong ebidensya, dokumento, o affidavit nga makapamauod sa maong mga alegasyon.
Sumala ni Suarez nga kinahanglan lig-on ang basehan sa mga pahayag ug dili lang magsalig sa mga istorya o mga mensahe sa social media.
Sa kinatibuk-an, misangpot ang diskusyon sa mas lapad nga pangutana bahin sa gigikanan sa pondo sa kampanya ug sa posibleng papel sa mga pribadong kontraktor sa politika.