Nagpadayon ang Department of Health (DOH) sa suod nga koordinasyon sa World Health Organization human sa mga report nga adunay posibleng hantavirus outbreak sa cruise ship nga MV Hondius, diin 38 ka Pilipino ang kabahin sa crew.
Sumala ni DOH spokesperson Albert Domingo, wala paโy natala nga sakit o reklamo gikan sa mga Pilipinong tripulante.
Ang barko nagpabiling nakaangkla sa baybayon sa Cape Verde samtang gi-quarantine ang mga sakay niini.
Gikumpirma sa WHO nga adunay duha ka kaso sa hantavirus ug lima pa ka ginadudahang kaso sakay sa barko.
Tulo ka pasahero ang namatay, samtang usa pa ang kritikal ug padayon nga ginatambalan sa ospital sa Johannesburg.
Matud sa DOH nga wala pay direktang hulga nga makaabot sa Pilipinas, ug ang responsibilidad sa repatriation sa mga tripulante anaa karon sa operator sa barko nga Oceanwide Expeditions.
Matud pa sa ahensya, talagsaon ra ang hantavirus sa mga tawo ug kasagarang makuha pinaagi sa kontak sa ihi o hugaw sa ilaga nga adunay virus.
Lakip sa mga simtomas niini ang hilanat, pananakit sa lawas, ug mga sintomas nga susama sa leptospirosis ug dengue.
Gipasabot usab sa DOH nga wala pay bag-ong natala nga kaso sa hantavirus sa Pilipinas ug padayon nilang gisubay ang kahimtang sa mga Pilipino nga sakay sa maong cruise ship.