Gihangyo karon sa Malaybalay City Federation of United Motorela Operators and Drivers Association ang lokal nga kagamhanan nga tugotan na silang makapataas sa pletehan tungod sa walay hunong nga pagsaka sa presyo sa lana.
Sa pakighinabi sa Bombo Radyo Malaybalay, gibutyag ni Federation President Marlon Igpit nga dako na kaayo ang epekto sa mahal nga gasolina sa kita sa kapin 600 ka mga motorela driver sa siyudad. Matud ni Igpit, gikinahanglan na ang pag-apruba ni Mayor Jay Warren Pabillaran sa ilang gisumite nga fare matrix aron makasugakod ang ilang sektor sa nagkamahal nga palitunon.
Nanawagan usab ang pederasyon ngadto sa nasudnong panggamhanan nga hingpit nang tangtangon ang excise tax sa petrolyo imbis nga magsalig lang sa panagsa nga ayuda. Sa pagkakaron, nagpabilin sa kapin 80 pesos ang litro sa gasolina sa dakbayan, butang nga gikaingong mokaon na sa dakong bahin sa ilang adlaw-adlaw nga kita.