Pormal nga gipahibalo sa White House nga “terminated” o human na ang giyera sa Iran dungan sa pag-abot sa gitakdang deadline sa pagtapos sa panagbangi niadtong Biyernes (oras sa Amerika).
Sumala sa usa ka senior official sa administrasyong Trump, ubos sa 1973 U.S. War Powers Resolution, ang mga operasyong militar nga nagsugod niadtong Sabado, Pebrero 28, gikonsiderar nga tapos na human nilabay ang 60 ka adlaw nga lugway nga gihatag sa Kongreso alang sa military operations nga walay pormal nga pagtugot sa lehislatura.
Kahinumdoman nga ang Estados Unidos ug Israel dungan nga miatake sa Iran niadtong Pebrero 28, 2026, duha ka bulan gikan karon.
Bisan pa niini, mipakita og pagsupak ang mga Democrats sama ni Senator Jeanne Shaheen sa New Hampshire, kansa miingon nga walay lig-ong basehan sa balaod ang pagdeklarar nga tapos na ang “hostilities” samtang nagpadayon pa ang presensya sa pwersang militar sa maong rehiyon.