Naangol ang usa ka 57-anyos nga lalaki human nabanggaan ang iyang gimanehong motorsiklo sa usa ka van sa Purok 5, Don Carlos Sur, Don Carlos, Bukidnon, niadtong Abril 30, 2026, sa alas 7:30 sa buntag.
Base sa report, nailhan ang biktima nga drayber sa XRM motorcycle nga residente sa Purok 6, Poblacion Norte sa maong lungsod.
Nasayran nga wala kiniy gihuptang driver’s license ug walay napakitang OR/CR sa gimanehoang motorsiklo.
Ang laing sakyanan nga nalambigit mao ang usa ka Nissan Van nga gipanag-iyahan ug gimaneho sa usa ka 51-anyos nga residente sa Brgy. San Nicolas.
Sa inisyal nga imbestigasyon, nasayran nga ang motorsiklo padulong sa kasadpan samtang ang van nagbiyahe paingon sa amihanan. Pag-abot sa maong intersection duol sa Doctors Hospital, aksidenteng nabanggaan sa van ang motorsiklo.
Tungod sa kusog nga impact, naguba ang duha ka sakyanan ug daling gidala ang drayber sa motorsiklo sa Bukidnon Provincial Hospital sa Maramag alang sa atensyong medikal. Ang drayber sa van gidala usab sa Don Carlos Municipal Police Station (MPS) alang sa dugang nga imbestigasyon.
Sa pagkakaron, ang duha ka sakyanan anaa na sa kustodiya sa kapulisan alang sa tukmang disposisyon.