Pito ka kabaw, walo ka manok, ug usa ka baboy ang pormal nga gipangayo sa mga lider sa pito ka tribu sa Bukidnon ngadto sa Provincial Agriculture Office (PAgrO). Kini human sa nahitabong kontrobersiya sa “Lechon Festival” niadtong Abril 16, diin giingong gipanampalasan ang kultura sa mga lumad.
Sumala ni kanhi NCIP-Bukidnon Head Shirlene Sario, ang mga kabaw gitagana alang sa ritwal nga “Hapuhap sa Ginhawa” aron ipasig-uli ang relasyon sa mga tribu ug sa mga nakalapas sa ilang tradisyon. Giklaro ni Datu Elvito Lantao nga dili kini silot, kondili usa ka pamaagi aron ayuhon ang namantsahang dungog sa ilang kabilin human gigamit ang mga sagradong IP accessories ug garments isip dekorasyon nga walay pagtugot.
Emosyonal usab nga gikondena ni Valencia City IPMR Bae Irene Pandian ang maong insidente, lakip na ang usa ka hurado nga misul-ob og dili angay nga bisti, nga alang kaniya nagpakita og kakuwang sa respeto sa kabilin sa mga katigulangan. Gawas sa mga mananap, gihangyo sa mga lider nga ipailalom sa orientasyon ang mga kawani sa gobyerno ug mokuha og usa ka Datu nga magsilbing taytayan sa PAgrO aron malikayan ang susamang lapses sa umaabot.
Gitakda karong Mayo 20 ang pinal nga panagtagbo didto sa Centennial Stage, Capitol Grounds, alang sa pagpahigayon sa maong ritwal. Gilauman nga pinaagi niini, hingpit nang maresolba ang isyu ug mabalik ang harmonya tali sa lokal nga kagamhanan ug sa mga tribu sa probinsya.