Kalit nga misaka ang presyo sa lana sa tibuok kalibutan human mas misamot ang tensyon tali sa Estados Unidos ug Iran, ilabi na sa nahitabong mga pag-atake sa mga barko sa Strait of Hormuz.
Sumala sa mga taho, ang presyo sa Brent crude misaka og hapit 7 porsyento o niabot sa kapin $96 matag bariles, samtang ang U.S. crude nisaka usab ngadto sa hapit $90. Kini human mibalik ang kabalaka sa mga negosyante nga mahimong mababagan ang agianan sa lana tungod sa nagkagrabe nga panagbangi.
Misamot ang kahimtang human giingong gidakop sa US Navy ang usa ka barko sa Iran sa Gulf of Oman, samtang ang Iran nibahad usab og bawos ug mibalibad sa pagtambong sa gikatakdang peace talks sa Pakistan hangtud nga dili kuhaon sa Amerika ang ilang naval blockade.
Tungod niini, nabalaka ang daghang mga nasod, lakip na ang Pilipinas, nga kon dili maresolba ang gubot sa Middle East, mahimong magpadayon ang pagsaka sa presyo sa lana ug gasolina sa mosunod nga mga adlaw. Mahinumdoman nga ang Strait of Hormuz maoy agianan sa hapit 20 porsyento sa suplay sa lana sa tibuok kalibutan.