Nasakmit sa kapulisan ang dul-an usa ka milyon ka pesos nga kantidad sa gituohang smuggled nga sigarilyo atol sa checkpoint operation sa Purok 2, Barangay Poblacion Libertad, Misamis Oriental, niadtong milabay’ng adlaw.
Gipatuman ang operasyon sa hiniusang pwersa sa Misamis Oriental Police Provincial Office, Regional Mobile Force Battalion 10, Iligan City Police Office ug Regional Maritime Unit 10, base sa intelligence information bahin sa sakyanang gilikayan matud pa ang mga checkpoint ug migamit og alternatibong mga dalan.
Nasakmit gikan sa usa ka puting SUV ang 1,045 ka ream sa Modern cigarettes nga gibanabanaang adunay market value nga P836,000.
Ang sakyanan gimanehoan sa usa ka 34-anyos nga lalaki ug may 40-anyos nga pasahero, kinsa gikan sa Albay ug Iligan City.
Matud sa inisyal nga imbestigasyon, target ihatud ang mga sigarilyo gikan sa Marawi City paingon sa Laguindingan ug Cagayan de Oro.
Gidala ang duha ka suspetsado ug mga nasakmit nga sigarilyo sa Libertad Municipal Police Station alang sa dokumentasyon ug profiling, samtang itugyan sa Bureau of Customs ang mga sigarilyo alang sa hustong disposisyon.