Nakatingkagol karon sa selda sa kapulisan ang duha ka bag-ong nailhang tigpayuhot sa ilegal nga druga, human malampusong gilusad ang usa ka buy-bust operation sa Purok 8, Barangay 1 niadtong Miyerkules sa hapon.
Matod pa sa Malaybalay City Police Station, giila ang mga dinakpan nga usa ka 20-anyos ug usa ka 30-anyos nga pulos mga lalaki. Nakuha gikan sa ilang posisyon ang unom ka heat-sealed sachets sa gituohang shabu nga dunay gibug-aton nga 3.074 gramos ug gibana-banang nagkantidad og P20,903.
Gawas sa ilegal nga droga, narekober usab sa mga operatiba ang markadong kwarta ug usa ka cellphone nga gigamit sa ilang transaksyon. Gihimo ang imbentaryo sa mga ebidensya didto mismo sa lugar nga nahitaboan atubangan sa mga opisyal sa barangay ug representante sa media aron masiguro ang integridad sa operasyon.
Sa pagkakaron, ang mga suspetsado gihikayan na sa kasong paglapas sa Comprehensive Dangerous Drugs Act of 2002 alang sa saktong disposisyon.