Pormal nang sugdan karong adlawa ang imbestigasyon sa House Committee on Justice may kalabotan sa impeachment complaint batok kang Vice President Sara Duterte human wala magpagawas og temporary restraining order (TRO) ang Supreme Court aron pugngan ang proseso.
Gikumpirma ni House Committee on Public Accounts Chair at Bicol Saro Party-list Representative Terry Ridon nga andam na ang tanan alang sa padayon nga pagdungog.
Sumala ni Ridon nga nakalinya na ang mga importanteng testigo, lakip si Ramil Madriaga nga giingong “bagman” sa bise presidente.
Gipasabot usab ni Ridon nga ang kasamtangang yugto usa pa lamang ka preliminary investigation ug dili pa pormal nga trial.
Dugang pa niini, ginatuman lamang sa Kamara de Representantes ang mandato niini ubos sa Konstitusyon nga susihon ang mga reklamo aron matino kung adunay igong basehan o probable cause nga ipadayon ang impeachment ngadto sa Senado.
Gilauman usab nga moatubang ang ubang opisyal sa gobyerno, mga abogado, ug ubang resource persons nga may kalabotan sa mga alegasyon.
Gikinahanglan silang magsumite og affidavits ug uban pang dokumento isip ebidensya.
Gipasiugda ni Ridon nga ang kredibilidad sa matag testigo pagasusihon pag-ayo ug ipailalom sila sa pagpanumpa aron masiguro nga ang ilang testimonya tinuod ug suportado sa lig-on nga ebidensya.