Gipang-apod-apod sa DILG Bukidnon Provincial Office ang cash assistance ngadto sa 14 ka mga kanhing miyembro sa New People’s Army (NPA) isip kabahin sa programa sa kagamhanan alang sa reintegration ug pagbalik sa malinawon nga panginabuhi.
Sa pakighinabi sa Bombo Radyo Malaybalay, gipahayag ni Daphne Kirstie B. Fabria-Mohamad sa DILG-Bukidnon, nga ang matag benepisyaryo nakadawat og kinatibuk-ang ₱65,000. Kini naglangkob sa immediate assistance ug reintegration support nga gitumong sa pagtabang sa ilang adlaw-adlaw nga panginabuhi human sila mibalik sa sabakan sa balaod.
Ang maong mga benepisyaryo naggikan sa pagdumala sa nagkadaiyang handling units sa militar sama sa 88th Infantry Battalion, ug 1st Special Forces Battalion sa San Fernando ug Manolo Fortich. Kini ang unang hugna sa pagpagawas sa maong ayuda alang niining kasamtangang tuig.
Sa laing bahin, usa sa mga benepisyaryo nga giila sa tago nga ngalan nga si Alyas Pinang o Jeng-jeng, mipahayag sa iyang dakong pasalamat sa nadawat nga hinabang. Matud niya, kapin usa ka tuig human sa iyang pagsurrender niadtong 2024, dako na ang kausaban sa iyang kinabuhi.
Iyang gikumpara ang iyang kahimtang kaniadto sa kabukiran nga puno sa kagutom, kakapoy, ug kahadlok, samtang karon, makatulog na sila og malinawon ug makakaon sa hustong oras. Ang nadawat nga kantidad dako og tabang sa iyang panginabuhi ilabi na sa pagsaka sa presyo sa mga batakang palaliton.
Sa pagkakaron, nagpaabot pa ang DILG og dugang pondo gikan sa nasudnong kagamhanan aron maserbisyohan pa ang uban nga mga former rebels sa Bukidnon. Nanawagan usab ang buhatan sa publiko nga suportahan ang mga programa alang sa kalinaw ug reintegration aron tuluyan nang matuldokan ang insurhensya sa probinsya.