Nanawagan si Presidente Ferdinand “Bongbong” Marcos Jr. sa tibuok nasud nga huptan ang mithi sa pagtinabangay ug lig-on nga pagtuo atol sa pagsaulog sa Pasko sa Pagkabanhaw karong adlawa.
Sa mensahe niini, gipasiugda sa Presidente nga kining adlawa maoy nagsimbolo sa kadaugan ni Hesukristo batok sa kamatayon ug ang pagtapos sa Semana Santa.
Matud pa niini, ang walay sulod nga lubnganan maoy lig-on nga kamatuoran nga ang kinabuhi kanunay nga modaug batok sa kangitngit ug ang pagtuo maoy maghatag og bag-ong kadasig sa matag usa.
Giawhag usab ni Marcos ang katawhan nga kuptan ang mithi sa kabubut-on ug pagtinabangay aron makab-ot ang usa ka mas lig-on nga nasud ubos sa tinguha sa “Bagong Pilipinas.”
Gipahinumdoman niini ang mga Pilipino nga ang mga sakripisyo ug pag-antos dili makawang tungod kay kini ang dalan padulong sa bag-ong paglaum.
Sa pagtapos sa mensahe, nanawagan kini nga mobangon ang tanan nga adunay bag-ong katuyoan ug lawom nga responsibilidad sa isigka-tawo, diin ang pagkamaayo ug pagkamanggihatagon maoy maghari sa matag adlaw.