Gipadayag ni Miss Philippines Earth 2025 Joy Barcoma ang baruganan batok sa gitawag nga “queerbaiting,” diin giakusahan niini ang pipila ka content creators sa paggamit sa LGBTQIA+ identity isip pamaagi sa pagkuha og atensyon sa social media.
Sa pamahayag sa beauty queen, gipasiugda ni Joy nga wala’y sayop sa pagka-gay, apan ang problema anaa sa mga indibidwal nga naggamit sa queer mannerisms ug personalidad isip pamaagi sa kalingawan ug kasikatan, samtang wala magpakita og klaro ug tinuoray nga suporta sa mga isyu nga giatubang sa komunidad.
Matud pa niini, ang maong pamatasan nagrepresentar sa usa ka porma sa eksploitasyon diin gihimong “content” ang identidad sa LGBTQIA+ nga wala’y hustong responsibilidad ug pagpanalipod.
Nunot niini, nanawagan ang beauty queen sa mga content creators ug sa publiko nga magpakita og tinuod nga alyansa pinaagi sa pagbarug alang sa katungod sa LGBTQIA+, ug dili lamang kutob sa paglakip niini sa content isip uso o pamaagi sa pagdani og online engagement.