Hingpit pang nihuyang ang kantidad sa piso sa pagsira sa trading kagahapon Marso 23 human natala ang foreign exchange rate nga P60.300 batok sa usa ka US dollar.
Kini na ang pinak-ubos o all-time low nga kantidad sa piso sa kasaysayan.
Mas ubos kini itandi sa P60.100 nga natala niadtong Marso 19, 2026.
Kahinumduman, nga nagpabilin ang maong rate sa misunod pang mga adlaw gumikan walay trading niadtong Biyernes sa selebrasyon sa Eid al-Fitr, samtang sirado usab ang merkado sa weekend.
Sumala sa mga analyst, naapektuhan ang piso sa mga external nga hinungdan sama sa pagsaka sa presyo sa lana ug sa geopolitical tensions sa Middle East, nga naghatag og kabalaka sa global nga ekonomiya.
Gilauman nga mahimong kritikal ang mosunod nga mga semana alang sa Bangko Sentral ng Pilipinas sa pagpatuman sa mga lakang aron mapabilin ang kalig-on sa piso batok sa dolyar.