Mukabat sa ₱100,000 ang damyos sa simbahan sa Iglesia sa Dios Espiritu Santo sa Purok 8, Overland, Halapitan, San Fernando, Bukidnon, human kini gilamoy sa kalayo pasado alas 7:45 sa buntag kagahapong adlawa.
Matod ni Senior Fire Officer 2 Oscar B. Coleta sa BFP San Fernando, paspas nga nikuyanap ang kalayo tungod kay light materials lamang ang gamit sa maong simbahan, ug gituohang hinungdan mao ang nabyaan nga gisindihan nga kandila.
Nagsugod ang kalayo sa altar ug nikuyanap sa mga kurtina, apan human sa 10 minutos nga operasyon, nakontrola kini ug gidklarang fire out alas 8:30 sa buntag. Nasayran nga natukod ang simbahan nadtong 1970s ug unta i-renovate kini sa sunod nga mga bulan.
Kini ang unang fire incident nga natala sa lungsod sa San Fernando sa tuig 2026, ug nagpahimangno ang BFP sa publiko sa pag-amping sa kandila ug uban pang posibleng hinungdan sa sunog.