Gitugotan sa International Criminal Court (ICC) ang pagdugang sa pito ka insidente sa kaso ni kanhi Presidente Rodrigo Duterte nga may kalabotan sa giingong mga krimen batok sa katawhan.
Apan gimandoan sa korte nga tangtangon ang usa ka insidente tungod kay nahitabo kini sa gawas sa gitakdang panahon nga gilatid sa usa sa mga pormal nga sumbong.
Sa desisyon niadtong Oktubre 9, gisalikway usab sa korte ang hangyo sa depensa nga susihon pag-usab ang dokumento sa mga akusasyon. Matod sa ICC, igo na ang kasamtangang dokumento aron maandam ni Duterte ang iyang depensa.
Lakip sa pito ka insidenteng gitugotan ang mga alegasyon sa pagpatay sa mga high-value target ug uban pang insidente nga may kalabotan sa kampanya batok sa ilegal nga droga.
Samtang, gipatangtang ang Incident 57 kay lapas kini sa panahon nga sakop sa Count 2, nga naglangkob sa mga giingong pagpatay gikan Hulyo 2016 hangtod Hulyo 2017.
Gimandoan usab sa ICC ang prosekusyon nga i-update ang listahan sa mga saksi, ebidensya ug trial brief sa dili pa o sa Oktubre 16, 2026.
Giklaro nga ang maong desisyon may kalabotan lamang sa sakop sa mga alegasyon nga mahimong hisgotan sa pagdungog.
Dili pa kini pinal nga hukom nga nagbuot kung sad-an ba o inosente si Duterte.