Gipahibalo ni Energy Secretary Sharon Garin nga mokabat sa 900,000 ka bariles sa krudo (diesel) ang gikatakdang moabot sa nasod sa mosunod nga mga semana karong bulan sa Abril. Ang maong suplay kabahin sa gihimong pagpamalit sa Philippine National Oil Company (PNOC) aron masiguro nga adunay igong reserba ang Pilipinas taliwala sa nagpadayong krisis sa enerhiya sa tibuok kalibutan.
Sumala ni DOE Undersecretary Sandy Sales, ang unang hugna nga 300,000 ka bariles moabot karong Abril 10, nga gikan sa Malaysia pinaagi sa usa ka trader sa Singapore. Duha pa ka kargamento nga tag-300,000 ka bariles ang gilauman nga moabot sa tunga-tunga ug sa katapusan sa Abril, nga posibleng gikan sa North Asia ug India. Gipasalig ni Garin nga padayon ang ilang paningkamot sa pagpangita og dugang suplay aron dili mahutdan ang nasod, samtang gipahinumdoman ang publiko nga magdaginot tungod sa kawalay kaseguruhan kon kanus-a matapos ang gubat sa Middle East nga nakaapekto sa presyo ug suplay sa lana.