Mokabat sa kapin ₱244,000 nga balor sa gidudahang shabu ang nakumpiska samtang siyam ka drug personalities ang nasikop sa gipahigayon nga sunod-sunod nga buy-bust operations sa kapolisan sa unom ka dapit sa Bukidnon kaniadtong Setyembre 5 ug 6.
Base sa report sa Bukidnon Police Provincial Office (BPPO) sa pamunoan ni Provincial Director PCOL Oliver Sotto Navales, ang labing dakong nakumpiska nahitabo sa Barangay Casisang, Malaybalay City diin nadakpan si alyas “Magins”, 48-anyos, nga naghupot og kapin ₱103,000 nga shabu ug usa ka SUV. Gisundan kini sa Maramag diin tulo ka suspek ang nasikop sa pampublikong sementeryo nga nakumpiskahan og kapin ₱54,000 nga ilegal nga tambal.
Samtang duha usab ka suspek ang nadakpan sa Valencia City nga naghupot og kapin ₱44,000 nga shabu, usa sa Lantapan nga nakumpiskahan og kapin ₱29,000, usa sa Talakag nga naghupot og kapin ₱9,000, ug usa ka alyas “Puto” sa Don Carlos. Ang tanang nasikop nga suspek gitanggong na sa matag estasyonan sa kapolisan ug nag-atubang sa pormal nga kasong paglapas sa Republic Act 9165.