Nasikop sa mga awtoridad ang usa ka 41-anyos nga lalaki human niini gipukpok ug gidunggab sa nabuak nga botelya sa ilimnon ang iyang 65-anyos nga kainom sa Purok 2B, Barangay Lumbo, Valencia City niadtong Domingo sa kaadlawon, Agosto 16, 2026.
Subay sa imbestigasyon sa Valencia City Police Station (CPS), nag-inom ang suspek ug ang biktima sa balay mismo sa biktima. Human mahurot ang usa ka botelya, gipugos matud pa sa biktima ang suspek nga mopalit pa og dugang ilimnon, apan nibalibad kini tungod kay dunay importanteng pagagastohan nga salapi. Nibalik sa kasuko ang biktima diin miresulta sa ilang paglalis, hangtod nga gipukpok sa suspek ang botelya sa ulo sa biktima ug gidunggab pa kini sa wala nga tiil gamit ang nabuak nga bildo.
Gidali sa pagdala sa Barangay Rescue Team sa Lumbo ang biktima ngadto sa Bukidnon Provincial Hospital sa Lungsod sa Maramag alang sa pagtambal. Samtang, ang suspek hapsay nga nadakpan sa mga otoridad sa Valencia CPS kauban ang mga duty CVO ug kasamtangan nga gitanggong sa estasyonan alang sa pormal nga pagpasaka og kaso.