Kritikal ang kahimtang sa usa ka 39-anyos nga lalaki human kini kalit nga gigulgulan sa liog sa mismong kauban niya sa panag-inom sa Purok 9, Quimtras, Butong, sa lungsod sa Quezon, Bukidnon.
Base sa taho, nahitabo ang maong insidente niadtong kagahapong adlawa, Hunyo 28, 2026, takna alas 6:10 sa hapon.
Sa inisyal nga imbestigasyon sa kapulisan, nasayran nga ang biktima, uban sa suspek nga usa ka 35-anyos nga lalaki, ug lain pang usa ka 49-anyos nga lalaki, malipayon nga nag-inom sa maong dapit nga duol ra usab sa balay sa suspek.
Apan tungod sa grabeng kahubog, kalit lang mipauli sa iyang balay ang suspek ug mikuha og sanggot (sickle). Sa iyang pagbalik sa dapit diin sila nag-inom, kalit ug walay daghang pangutana nga iyang gigulgul sa liog ang biktima. Human sa maong ngilngig nga panghitabo, daling mikagiw ug miikyas ang suspek paingon sa unahan nga kalubihan o dako nga katamnan sa tubo (sugarcane field).
Dali usab nga gidala ang biktima ngadto sa Bukidnon Provincial Hospital (BPH) sa Maramag, Bukidnon alang sa dinalian nga medikal nga pagtambal.
Sa pagkakaron, ang mga intelligence operatives sa Quezon Municipal Police Station nagpahigayon na og subsub nga hot pursuit operation aron madakpan ug mapatubag sa balaod ang miikyas nga suspek.