Posibleng mahimong pinakataas nga impeachment trial sa kasaysayan sa Pilipinas ang paghusay batok kang Bise Presidente Sara Duterte, human gibutyag sa Senate Secretary nga si Renato Bantug nga mahimong moabot kini og pito ka bulan kung sundon ang gitakdang tulo ka adlaw nga pagdungog matag semana.
Ang banabana gibase sa 92 ka adlaw nga gihangyo sa House prosecution panel ug 30 ka adlaw alang sa depensa aron mapresentar ang ilang mga testigo ug ebidensya.
Apan, posible pa kining mapamubo kung mapaspasan ang presentasyon sa mga saksi ug kapin sa 10,000 ka piraso sa ebidensya.
Kung ikumpara sa nangaging mga impeachment trial, 44 lamang ka adlaw ang gidugayon sa paglitis kang kanhi Chief Justice Renato Corona niadtong 2012, samtang 23 ka adlaw ang kaso batok kang kanhi Presidente Joseph Estrada niadtong 2001.
Bisan sa taas nga gidugayon sa trial, gipasalig sa Senado nga dili mapahunong ang ilang ubang responsibilidad sama sa paghimo og mga balaod ug paghisgot sa 2027 national budget.
Target usab sa Senado nga mahuman ang impeachment trial sulod sa pito hangtod walo ka bulan, ug posible kini matapos sa Pebrero sa sunod tuig kon magsugod ang paglitis sa Hulyo 16.
Gipalig-on usab sa Senado ang mga pagpangandam, lakip ang pagpatuman og mas hugot nga seguridad ug pagrepaso sa nangaging impeachment trials aron masiguro ang hapsay ug organisadong pagdumala sa kaso.