Mukabat sa 37 ka mga Friends Rescued (FRs) ang malampusong gipailawom sa profiling ug pagproseso alang sa programang Enhanced Comprehensive Local Integration Program (E-CLIP) sa Sitio Malantao, Barangay Halapitan, lungsod sa San Fernando, Bukidnon.
Ang maong inisyatiba gipahigayon pinaagi sa hiniusang paningkamot sa 89th Infantry “Makatao” Battalion, Provincial Social Welfare and Development Office (PSWDO), ug Department of Agrarian Reform (DAR) aron masiguro ang hapsay nga pagbalik sa mga kanhi rebelde sa sabakan sa katilingban.
Pinaagi niini nga profiling, daling matino sa mga ahensya kung unsa nga mga interbensyon ug ayuda ang angay nga ihatag kanila, sama sa hinabang-pinansyal, kahigayonan sa pangabuhian, suporta sa pagpanguma, ug psychosocial services.
Human sa maong kalihokan, giapod-apod usab ang mga food package ngadto sa mga FRs isip dinalian nga tabang sa gobyerno samtang nagasugod sa ilang bag-ong kinabuhi.
Matud sa 89IB, kini nga lakang nagpakita lamang sa seryosong tinguha sa kagamhanan nga makab-ot ang malungtarong kalinaw ug kalamboan sa tibuok probinsya sa Bukidnon.