Boluntaryong mitahan sa mga otoridad ang usa ka 19-anyos nga suspetsado nga giila sa alyas “Johny” human kini malambigit sa usa ka duguong pagpangdungab sa Cabanglasan niadtong Mayo 22, 2026.
Ang insidente mikalas sa kinabuhi sa usa ka 37-anyos nga lalaki nga residente sa Purok 8, Mandahican, kinsa nakaangkon og seryosong samad dinunggaban sa wala nga bahin sa iyang tiyan.
Base sa imbestigasyon sa kapulisan, naglakaw pauli ang biktima kauban ang usa ka alyas “Opaw” sa dihang nagkasumpaki ang duha nga miresulta sa sinumbagay. Misulay pa og dagan paingon sa iyang balay ang biktima aron makalikay, apan gigukod gihapon kini sa iyang kauban.
Paglabay sa pipila ka gutlo, miabot si alyas “Johny” sa dapit sa krimen kauban ang laing indibidwal nga giila sa alyas “Ogang.”
Diha-diha dayon, giingong mikuha og kutsilyo ang suspek ug gilabay kini ngadto sa biktima diin naigo ang tiyan niini nga maoy hinungdan sa hinanaling kamatayon. Bisan ug paspas nga miikyas ang mga suspetsado human sa krimen, apan nakadesisyon ra usab si alyas “Johny” nga mosurender pipila ka oras ang milabay samtang giandam na sa mga otoridad ang tukmang kaso batok niini.