Mukabat sa 2,652 ka mga violator ang nadakpan sa Police Regional Office 10 (PRO10), sa pagdumala ni Regional Director PBGEN Christopher N. Abrahano, atol sa mas gihigpitan nga pagpatuman sa Safer Cities Initiative sa tibuok Northern Mindanao gikan Mayo 14 hangtod 20, 2026.
Sa maong operasyon, ang labing sagad nga kalapasan mao ang pag-inom ug pagsigarilyo sa publiko nga adunay 1,636 ka dinakpan, gisundan sa 521 ka menor de edad nga nakalapas sa curfew, 368 ka walay taming o shirtless nga naglaroy-laroy, 37 ka naggamit og karaoke lapas sa oras, ug 60 pa ka laing ordinansa.
Kon basehan ang dapit, ang Iligan City ang nakatala sa kinatas-ang ihap sa mga malapason nga miabot sa 944, gisundan sa Cagayan de Oro City (820), Lanao del Norte (532), Misamis Occidental (190), Bukidnon (52), samtang tag-14 usab ang narekord sa Camiguin ug Misamis Oriental.
Sa kinatibuk-ang disposisyon sa kaso, moabot sa 4,148 ka indibidwal ang gipamulta, tulo ang pormal nga gikasohan, ug 3,996 naman ang giwarningan ug gibuhian subay sa lokal nga mga ordinansa.
Gipasunod kining maong lakang aron mapakita ang mas gipakusog nga visibility sa kapulisan ug ang hugot nga tinguha sa pagmintinar sa kalinaw sa tibuok rehiyon.
Gipasiugda pa ni PBGEN Abrahano nga pinaagi sa makanunayong pagpatuman sa balaod, nagtinguha ang PRO10 nga mapalambo ang disiplina ug mapasalig ang kaluwasan sa publiko, uban sa pahinumdom nga ang pagpreserba sa kahapsay responsibilidad sa tanan.