Nalakip sa bag-ong nakab-ot nga framework agreement tali sa Estados Unidos ug Iran ang usa ka $300 bilyon nga private investment fund nga nagtumong sa pagpukaw sa ekonomiya ug pagpamuhunan didto sa Iran.
Sumala sa mga taho, kapin sa katunga sa maong bilyonaryong pondo ang duna na’y mga pasalig o pledge gikan sa mga dagkong pribadong kompanya sa Amerika, Gulf states, Asya, South America, ug Africa. Ang maong pondo, nga giulohan og Reconstruction and Development Fund, lunsay nga gikan sa pribadong sektor ug walay sagol nga pondo o buhis gikan sa gobyerno.
Giklaro ni US President Donald Trump ug Vice President JD Vance nga dili kini direktang hatag o “handout” sa gobyerno sa Amerika. Pwede lang kini mapahimuslan sa Iran kon hingpit nilang tumanon ang mga kondisyon sa kasabutan, lakip na ang pagguba sa ilang nuclear program, pagtugot sa internasyonal nga inspeksyon, ug ang pagpadayon sa ceasefire.
Kini nga pondo naporma isip alternatibo human gibalibaran sa Amerika ang unang hangyo sa Iran nga $400 bilyon nga bayad-pinsala sa giyera (war reparations).