Gikumpirma sa Civil Aviation Authority of the Philippines (CAAP) nga wala gigamit ni kanhi Kongresista Zaldy Co ang tulo ka air assets nga karon anaa na sa gawas sa nasud aron makabiya siya sa Pilipinas.
Sumala ni CAAP Director General Raul Del Rosario, base sa gisumiter nga air manifest sa duha ka helicopter ug usa ka eroplano, wala mailakip ang ngalan sa kongresista.
Usa sa mga aircraft ang giingon nga gamiton unta alang sa medical evacuation, apan wala makumpirma sa CAAP kung adunay perenti ni Co nga misakay niini.
Gipasabot pa sa ahensya nga mahimo pa nga mabalik sa nasud ang tulo ka air assets kon makakuha na og freeze order ug order for forfeiture.
Kon makompleto na ang mga maong dokumento, magpadala dayon ang mga opisyal sa CAAP aron mauli ang mga aircrafts.
Gisiguro usab ni Del Rosario nga dili kini mabaligya sa ubang nasud, gumikan nga kinahanglan una kini marehistro sa orihinal nga nasud usa kini marehistro pag-usab.
Nakamonitor usab ang ahensya ug padayon ang ilang koordinasyon sa mga foreign aviation authorities aron masuta kung asa na nahimutang ang mga air assets, partikular na sa Malaysia ug Singapore.