Misaka sa 24 ang ihap sa mga nakalas nga kinabuhi human naigo sa pagpamomba ang usa ka tren nga gisakyan sa mga sundalo sa Balochistan, Pakistan kagahapong adlawa.
Gikumpirma sa usa ka opisyal nga ang pag-atake nahitabo sa Quetta diin usa ka sakyanan nga puno sa eksplosibo ang mibangga sa usa sa mga bagon sa tren, nga miresulta sa dakong pagbuto nga nagpahinabo usab sa pagkatumba ug pagkasunog sa duha ka bagon.
Kapin sa 50 ka mga tawo ang naangol sa maong insidente nga nahitabo sa usa ka dapit diin kasagarang anaa ang mga security forces, nga miresulta usab sa pagka-guba sa mga building ug mga sakyanan sa palibot.
Ang separatistang pundok nga Balochistan Liberation Army ang miako sa responsibilidad sa maong pag-atake nga nagbilin og kagubot sa maong dapit.