Patay ang duha ka tao, lakip na ang usa ka menor-de-edad, human sa aksidente sa motorsiklo sa Provincial Road, Purok-2, Barangay Lingating, Baungon, Bukidnon.
Base sa imbestigasyon, nalambigit ang usa ka motorsiklong XRM 125 nga kolor itom ug gray, nga adunay plaka K905CN, gimaneho sa usa ka 30-anyos nga lalaki, minyo, collector, uban sa iyang 27-anyos nga backrider nga babaye; ug usa ka motorsiklong raider kolor itom, nga adunay plakang 608LAE, nga gikatahong gimaneho sa usa ka menor-de-edad nga lalaki.
Ang tanang nalambigit sa aksidente pulos residente sa Purok-2, Barangay Lingating, gawas sa minor nga gikan sa Barangay Danatag, Baungon. Nagbiyahe sa usa ka direksyon ang duha ka motorsiklo.
Ang unang motorsiklo nagbyhae pauli samtang ang ikaduhang motorsiklong raider gikan sa Barangay Danatag.
Gikaingong nag-senyas matud pa ang drayber sa unang motorsiklo nga moliko paingon sa wala nga bahin, apan nabanggaan kini sa likod nga bahin sa ikaduhang motorsiklo. Tungod sa kusog nga impact, natumba ang duha ka motorsiklo ug nahulog ang mga sakay niini.
Ang drayber ug backrider sa unang motorsiklo gidala sa Northern Mindanao Medical Center sa Cagayan de Oro City, apan gideklarang dead on arrival ang backrider samtang ang drayber sa ikaduhang motorsiklo gideklarang dead on the spot.
Anaa karon sa kustodiya sa Baungon Municipal Police Station ang duha ka motorsiklo alang sa hustong disposasyon.