Unom ka tawo ang namatay sa sunod-sunod nga airstrike sa Gaza niadtong Sabado. Sumala sa otoridad sa Palestine, lakip sa nakalas ang usa ka journalist ug duha ka menor de edad. Sa report, unang naigo sa pag-atake ang usa ka residential apartment sa Gaza City pasado alas dos sa kaadlawon.
Duha sa mga biktima mao ang managsuon nga sila Zina, 4 anyos, ug Lana, 14 anyos. Bisan pa nga gidala dayon sila sa ospital, wala na sila masalbar pa sa mga doktor.
Sa laing insidente sa Bureij refugee camp sa sentral nga bahin sa Gaza, tulo pa ka indibidwal ang namatay, lakip si Ahmed Wishah nga nagtrabaho isip cameraman sa usa ka international media organization.
Matud sa Israeli military, ang operasyon usa ka “precise strike” nga gitumong kang Wishah, nga giakusahanng adunay kalambigitan sa military wing sa Hamas ug giisip nga posibleng hulga sa ilang pwersa. Apan gisupak kini sa Hamas ug ubang Palestinian factions.