Duha ka kanhing miyembro sa Communist Terrorist Group o CTG ang boluntaryong misurender sa mga otoridad ug mitugyan og duha ka improvised shotgun ug upat ka bala sa Barangay Tagbak, Talakag, Bukidnon niadtong miaging adalaw.
Takna sa alas-4:35 sa hapon dihang pormal nga misurender ang duha sa headquarters sa 1004th Maneuver Company sa Regional Mobile Force Battalion 10.
Giila ang duha pinaagi sa mga alyas nga “Evie,” 40 anyos, ug “Junnie,” 43 anyos, nga susamang mga mag-uuma ug residente sa Lantapan, Bukidnon.
Matud sa kapulisan, ang duha nalista isip mga nahibiling miyembro sa usa ka dismantled Communist Terrorist Group.
Sa ilang pagsurender, matag usa kanila mitugyan og usa ka improvised shotgun ug duha ka 12-gauge ammunition, nga mikabat sa duha ka armas ug upat ka bala.
Gipangulohan sa 1004th Maneuver Company ang proseso, uban sa Bukidnon Provincial Intelligence Unit ug Bukidnon Provincial Intelligence Team.
Anaa na karun sa kustodiya sa 1004th Maneuver Company ang duha ka misurender ug ang mga armas ug bala alang sa custodial debriefing, profiling ug hustong disposisyon.