Nanawagan ang Samahang Industriya ng Agrikultura o SINAG sa gobyerno nga unahon ang paghatag og tabang sa mga lokal nga prodyuser ug mag-uuma nga naapektuhan sa bag-ohay nga mga bagyo ug habagat.
Matud ni SINAG Executive Director Jayson Cainglet, kinahanglan nga ipunting sa gobyerno ang pagpasig-uli sa lokal nga produksyon ug pagbangon sa mga mag-uuma human sa kadaot nga nahatag sa panahon.
Matud niini, imbis nga mosalig dayon sa importasyon aron pun-an ang kakulang sa suplay, mas angay nga tabangan ang mga mag-uuma nga makabalik dayon sa pagpananom ug pagprodyus.
Gisugyot sa grupo ang dali nga pag-apod-apod sa binhi, fingerlings, abono ug uban pang gikinahanglang farm inputs aron mapadali ang pagbangon sa sektor sa agrikultura.
Sumala pa sa SINAG, kinahanglan sundon ang polisiya nga “local production first” ilabina panahon sa temporaryong kakulang sa suplay tungod sa mga kalamidad.