Midangop sa Department of Justice si Atty. Levito Baligod kauban ang 18 ka kanhing bodyguards kagahapong adlawa aron manumpa sa ilang counter-affidavit nga gisumite sa San Fernando City Prosecutors Office sa La Union.
Matud ni Baligod, ilang gipahigayon ang pagpapanumpa sa DOJ aron ipadala na lamang pinaagi sa koreo ang maong dokumento ngadto sa piskalya sa umaabot nga Lunes.
Ang maong kontra-salaysay may kalabotan sa reklamong cyber-libel ug libel nga gisang-at ni La Union Rep. Paolo Ortega batok sa grupo tungod sa alegasyon sa pagdawat og maleta.
Nagpahayag usab ang kampo sa mga bodyguards sa ilang paglaom nga mabasura ang mga kaso nga giatubang nila, ilabina kay ilang gituohan nga ang mga reklamo gisang-at gawas sa tukmang hurisdiksyon sa Quezon City Prosecutors Office.