Gisagop ug naluwas sa elite unit sa US Air Force ang 11 ka mga hamtong nga pasahero human ang usa ka pribadong eroplano nga gikan sa Bahamas nahagsa ug nileybel sa Atlantic Ocean dapit sa baybayon sa Melbourne, Florida.
Sumala sa taho gikan sa U.S. Coast Guard, ang maong Beechcraft BE30 nga eroplano nakasinati og aberya sa makina samtang nagbiyahe padulong sa Freeport.
Sa wala pa kini hingpit nga naunlod, ang eksperyensyadong piloto nagmalampuson sa paghimo og usa ka “controlled crash landing” ug nadala ang tanang pasahero ngadto sa usa ka life raft.
Ang mga biktima nag-antos ug naglutaw-lutaw sulod sa hapit lima ka oras nga walay ideya kung duna bay motabang kanila samtang padulong usab ang usa ka kusog nga unos.
Naabtan sila sa mga tigluwas gikan sa 920th Rescue Wing sa Air Force Reserve pinaagi sa usa ka helicopter human makuha ang signal sa emergency locator.
Taliwala sa kakuwang sa krudo sa helicopter, paspas nga gi-airlift ug giisa ang tanang 11 ka survivors ug dinalian silang gidala sa Melbourne Orlando International Airport diin sila kasamtangang nagpaalim sa ospital sa lig-on nga kondisyon