Nasakmit sa kapulisan sa Bukidnon ang duha ka kontrabando nga nagkantidad og kapin ₱5 milyones nga gilangkuban sa smuggled nga sigarilyo ug iligal nga droga atol sa duha ka managlahi nga operasyon sa lalawigan.
Sa eksklusibong pakighinabi sa Bombo Radyo kay PCAPT. Sheila Joy Jangad, tigpamaba sa Bukidnon Police Provincial Office, nga ang maong operasyon gikan sa lungsod sa kalilangan ug dakbayan sa Valencia.Una niini sa lungsod sa Kalilangan, Bukidnon diin nakumpiska ang ₱3 milyon kantidad sa smuggled nga sigarilyo sa Regional Border Control Point sa Brgy. Pamotolon.
Saysay pa ni PCAPT Jangad nga usa ka garbage truck nga kolor yellow ug green nga gikan pa sa Iligan City nga padulong unta sa General Santos City ang gipahunong sa mga otoridad human makit-an sa plain view ang 75 ka master cases sa sigarilyo nga 3,750 ka reams.
Nasikop ang drayber ug iyang kauban, samtang ang mga kontrabando giturn-over sa Bureau of Customs alang sa hustong disposisyon.Samtang sa Valencia City, nadakpan ang magtiayon nga gikan sa Wao, Lanao del Sur human silang maaktuhan nga nagdala og iligal nga droga.
Gipahigayon ang anti-drug operation diin nakuha gikan sa mga suspetsado nga sila si alyas “Kairo,” 35 anyos, ug iyang asawa nga si alyas “Marie,” 46 anyos, ang shabu nga mitimbang og 301.2 gramos ug gibanabana nga nagkantidad og P2M.
Sumala sa imbestigasyon, misulay pa og dagan si Kairo human niya maaktuhan sa mga pulis nga iyang katransaksyon, hinungdan nga gipusil sa kapulisan ang ligid sa ilang pickup aron mapahunong kini.