Gipanghimakak ni House Committee on Justice Chairperson Gerville Luistro ang alegasyon ni VP Sara Duterte nga adunay mga mambabalaod nga matud pa nakakwarta sa impeachment case batok sa bise presidente.
Matud ni Luistro, sulod sa duha ka bulan nga pagdungog sa House Justice Committee, wala siyay nadunggan o nasinati nga adunay tanyag, pagpanghadlok, o pabor nga nalambigit sa proseso.
Dugang usab niini nga sukad sa unang adlaw sa deliberasyon, wala’y niusa nga miduol kaniya kabahin sa maong impeachment proceedings.
Gipasiugda ni Luistro nga ang impeachment usa ka konstitusyonal nga proseso nga dili angay malangan.
Human sa sponsorship speech ug plenary debate sa Mayo 11, gilauman niya nga mosunod dayon ang botohan kon ipadala ba sa Senado ang articles of impeachment.
Kumpyansa usab si Luistro nga makab-ot sa Kamara ang igo nga ihap sa boto.
Sumala sa mga mambabalaod, kapin sa 200 ka kongresista na ang nagpadayag og suporta sa articles of impeachment diin labaw sa gikinahanglang 106 ka boto o 1/3 sa tanang miyembro sa Kamara.
Bisan pa sa mga isyu sa political affiliations ug sa umaabot nga 2028 national elections, naglaum si Luistro nga ang konsensya sa mga mambabalaod ug ang labing maayong interes sa nasud ang mopatigbabaw sa ilang desisyon.
Dugang pa ni Luistro, nga importante nga maghatag usab og kaugalingong ebidensya ang kampo ni Vice President Duterte sa dili pa himuon ang pinal nga desisyon sa maong impeachment complaint.