Sikop ang duha ka lalaki sa gikasang drug buy-bust operation sa Purok 5, Barangay 9, Malaybalay City, niadtong Martes sa buntag, Abril 7, 2026.
Base sa report gikan sa Bukidnon Police Provincial Office (BPPO), nahitabo ang operasyon alas 11:12 sa buntag diin malampusong nadakpan si alyas “Yolly,” 33-anyos, residente sa Brgy. Miglamin, ug ang kauban niini nga usa ka 27-anyos nga lalaki nga taga-Barangay 9.
Narekober gikan sa mga suspek ang pito ka sachet sa gidudahang shabu nga adunay gibug-aton nga 4.074 gramos ug gibana-banang duna’y street value nga ₱27,703. Apil usab sa nasakmit ang usa ka coin purse, cellphone, ug ang ₱500 nga marked money nga gigamit sa operasyon.
Kasamtangang anaa na sa kustodiya sa Malaybalay City Police Station (CPS) ang mga dinakpan alang sa hustong disposisyon. Ang mga nakuhang ebidensya gidala na usab sa Bukidnon Forensic Unit alang sa laboratory examination.
Giandam na sa kapulisan ang pagpasaka og kasong paglapas sa Sections 5, 11, ug 26 sa Article II sa R.A. 9165 o ang Comprehensive Dangerous Drugs Act of 2002 batok sa mga suspetsado.